01

Балаҕан ыйын 10-12 күннэригэр Томпо улууhун Мэҥэ Алдан нэһилиэгэр Дьокуускайтан Саха национальнай гимназия 9б кылааһын үөрэнээччилэрин ураты экспедицията кэлэ сырытта. Бу тэрээһин сүрүн сыалынан оҕолорго Мэҥэ Алдан устуоруйатын сырдатыы, тимири уһаарыы кистэлэҥнэрин көрдөрүү буолла. 35 киилэ хайа боруодатыттан 12 киилэ болгуону ыллылар.

Мэҥэ Алдантан төрүттээх тимир ууһа, гимназияҕа технология учууталынан үлэлиир Комиссаров Феликс Анатольевич, СӨ үтүөлээх учуутала, гимназияҕа үөрэх чааhыгар дириэктэри солбуйааччы, географ Михайлова Тамара Владимировна, тимир ууһа Данилов Александр Дмитриевич уонна 10 уол, ол иһигэр биhиги уолбут, оскуолабытыгар үөрэнэ сылдьыбыт Комиссаров Женя, ыалдьыттаатылар. Олохтоох тимир уустара Захаров Альберт Иванович, Рудых Александр Егорович бу тэрээһин ситиһилээхтик ааһарын туһугар көмө-тирэх буоллулар. Олохтоох оҕолортон Канаев Толя, Колодезников Ильдар 8-с кылаас үөрэнээччилэрэ тэҥҥэ сылдьан көрдүлэр-иһиттилэр.

02

0304060507

Бастакы күҥҥэ үөрэнээччилэр салайааччыларын кытта Е.П.Неймохов аатынан литератураны, кыраайы үөрэтэр З.Д. Тарасова дириэктэрдээх олохтоох түмэлгэ сылдьан, нэһилиэк устуоруйатын кытта билистилэр. Онтон Алдан эбэ кытылын устун хаамтылар, хайа боруодатын көрдөөн, булан, бытархай гына үлтүрүттүлэр.

Иккис күҥҥэ кирпииччэнэн, туойунан оһох оҥорон, уот оттон, түүн хойукка диэри тимири уһаардылар. Бүтүүтүгэр болгуону таһааран эллээтилэр, кыстыкка таптайдылар, оҥоһук оҥорорго анаан бэлэмнээтилэр. Үлэ хаамыытын бириэмэтин хаптаһыҥҥа бэлиэтэнэн истилэр.

08 09 10

Оҕолор Е.П.Неймохов аатынан орто оскуолаҕа ыалдьыттаатылар, үөрэх кыһатын устуоруйатын түмэлигэр, оҕолор айар үлэлэрин быыстапкатыгар сырыттылар. Түмэл үлэһитэ, төрүт култуура учуутала  А.С. Колодезникова оҕолорго чугас өттүн кэпсээтэ.

«Маннык тэрээһин, биллэн турар, уол оҕо иитиитигэр улахан суолталаах, өбүгэлэрбит үтүө үгэстэрин, сөбүлүүр дьарыктарын илэ харахтарынан көрөн, илиилэринэн тутан-хабан элбэҕи биллилэр, умнуллубаттыы өйдөрүгэр хатаатылар«, — диэн тэрийээччилэр санааларын эттилэр.

Ааптар: Анджела Гоголева

http://ulus.media/2018/09/13/saha-natsionalnay-gimnaziyatyin-reneechchilere-me-e-aldannaryi-kyitta-timiri-u-aartyilar/

Издание: «Газета «Томпонский вестник»»

Добавить комментарий

Ваш адрес email не будет опубликован. Обязательные поля помечены *