DSC_0856      Ахсынньы ый 1 күнүгэр Хомус күнүгэр аналлаах Уус-Алдан Бороҕонугар «Саха аатын ааттатар — алгыстаах хомус» тэрээһин Олоҥхо дьиэтигэр буолан ааста.
Бу күн Хомус Аан дойдутааҕы Түмэлин уонна киинин үлэһиттэрэ, өрөспүүбүлүкэ бастыҥ хомусчуттара ыалдьыттаатылар, бэйэлэрин сатабылларын үллэстэн маастар кылаастары биэрдилэр,  хомус түмэлиттэн араас дойдулар хомустарын быыстапкалаатылар уонна өрөспүүбүлүкэ бастыҥ хомус уустарын оҥоһуктарын атыытын тэрийдилэр. Улуустааҕы киин библиотека улууска хомус сайдыытын, улуус хомусчуттарын, уустарын кэпсиир киэҥ ис хоһоонноох быыстапканы туруордулар. Тэрээһин үөрүүлээх аһыллыытыгар улуус баһылыгын солбуйааччы, улуустааҕы Олоҥхо Ассоциациятын бэрэссэдээтэлэ Михаил Васильевич Борисов, улуус культураҕа управлениетын солбуйар начальнига, улуустааҕы Хомус түмсүүтүн салайааччыта Лена Семёновна Павлова кыттыыны ыллылар, эҕэрдэ тылларын эттилэр. Хомус Аан дойдутааҕы Түмэлин уонна киинин учуонай сэкэрэтээрэ Эркин Павлович Алексеев хомус сайдыытыгар киллэрбит кылааттарын иһин хомус музейын Бочуотунай Грамотатын улууспут биир бастыҥ хомус ууһугар Петр Дмитриевич Куличкиҥҥа уонна Махтал суругу культура управлениетын кылаабынай специалиһа Анна Егоровна Федороваҕа туттарда.
Маастар кылаастары Эркин Алексеев, Хомус түмэлин хомус оскуолатын салайааччыта Айтал Мырсанов, уус алданнар биир дойдулаахтара, кэскиллээх ыччаттар Ирина Охлопкова, Алдан Рожин биэрдилэр. Маастар кылаастарга барыта 68 оҕо уонна улахан дьон сырыттылар.
Бырааһынньыктааҕы эҕэрдэ кэнсиэргэ улуус бастыҥ хомусчуттара Иван Сергеев, Альберт Находкин,  Бороҕоннооҕу оҕо искусство оскуолатын, Курбуһахтан «Сардаҥа», Дүпсүнтэн «Кэскил» хомусчуттар бөлөхтөрө, Тулунаттан Людмила, Валерий Троевтар Айыына, Кэскилээнэ, Сахалина диэн үс кыталык кыргыттарынаан, Коля Бочкарёв, Арсалан Прибылых (Дүпсүн), Валерия Васильева, Олеся Винокурова (Курбуһах),  куораттан ыалдьыттарбыт уонна ыраах Японияттан нуучча тылын үөрэтэ кэлбит Сатоши Кондо кытыннылар. Дүпсүн орто оскуолатыттан Бочкарева Наталья Григорьевна салайааччылаах синтезатордаах кыргыттар «Кэскил» хомус бөлөҕүн кытта сахалыы матыыптары оонньообуттарын көрөөччүлэр сэргии иһиттилэр. Хомус кэнсиэрин бэйэлэрин ылбаҕай ырыаларынан улуус бастыҥ ырыаһыттара Марсен Протопопов, Дуолан Бочкарев киэргэттилэр, хомус туһунан хоһооннору Надежда Гоголева, Татьяна Бурцева, Анна Готовцева, Вера Копырина, Елизавета Данилова, Анна Федорова аахтылар.
Кэнсиэргэ кэлбит дьон Хомус аптаах, хомуһуннаах тыаһын истэн алгыстанан, арчыланан бардылар.

Добавить комментарий

Ваш адрес email не будет опубликован. Обязательные поля помечены *