Чахов Александр Иванович ааспыт үйэ 50-с сылларыгар улуу композитор  Г.А.Григорян сүбэтинэн М.Н.Жирков саха норуотун муусукатын туһунан научнай архыыбын кытта билсиспитэ. Онтон кынаттанан, саха норуотун музыкальнай култууратын чинчиинэн утумнаахтык дьарыктаммыта. «Саха былыргы музыкальнай инструменнара», «Өбүгэлэрбит музыкаларын төрүт дорҕоонноро», «Эдэр саас ырыалара» о да а. кинигэлэри бэчээттэтэн таһаартарбыта. Кинигэлэр музыкальнай култуура эйгэтигэр  саха энциклопедиятын быһыытынан билиниллэллэр.

Саха былыргы музыкальнай үнүстүрүмүөннэрин: сэргэ, чороон, кылыһахтаах, кытыйа кырыымпалары, кыйаҕы, кеманчаны, чаачары, ох сааны, дьөллөркөй күпсүүрү, струналаах дүҥүрү, дорҕоон дүҥүрү, тыал дьуораанньыгы, дьарыктаны, дьаҕаны, ойдуону, айааны, таҥсыры, табыгы, биһилэхтээх, хоруопкалаах хомустары — тилиннэрэн норуокка бэлэхтээбитэ. Олор саха муусукатын сайдыытын устуоруйатын ыччакка тарҕаталлар, билиһиннэрэллэр.

Чахов А.И. 1968 сыллаахха алтынньы 22 күнүгэр бэйэтэ айбыт биһилэхтээх хомуһа «Хомус – музыкальнай инструмент» диэн аатынан Советскай Союз Государственнай реестрыгар 1161775 нүөмэринэн киирбитин туһунан сибидиэтэлистибэ ылбыта. Ити түгэн муусука эйгэтигэр биир үктэли дабайыы туоһутунан буолбута. Оттон Хомус мусуойугар бэлэхтээбит 496 музейнай предметэ норуот бас билэр кылаатын быһыытынан сыаналанар.

Олунньу 20 күнүгэр күнүс 15 ч. Чахов Александр Иванович үбүлүөйдээх 85 сааһын туолар кэрэ-бэлиэ күнүгэр саха муусукатын устуоруйатын тилиннэриигэ үлэтин кэрэһэлиир быыстапкаҕа ыҥырабыт.