Удьуор уус Владимир Семенович Гоголевы кытта интервью.

Раздел: Статьи

Владимир Семенович Мэҥэ-Хаҥалас Табаҕатыгар 1960 сыллаахха ыам ыйын 24 күнүгэр аан дойдуга аатырбыт уус Семен Иннокентьевич Гоголев – Амынньыкы дьиэ кэргэнигэр кыра оҕонон күн сирин көрбүтэ.

Владимир Семенович 60 сааһын туолбут юбилейынан сибээстээн көрсөн кэпсэттибит.

  • Владимир Семенович, өссө төгүл үбүлүөйгүнэн эҕэрдэлиибин! Эн аатырбыт Амынньыкы Уус уола буолаҕын, оҕо эрдэххиттэн хайдах хомус оҥоһулларын көрөн улааттаҕын. Бэйэн хаһан маҥнайгы хомускун оҥорбуккунуй, уопсайынан хаһааҥыттан уһанан саҕалаабыккыный?
  • Мин кыра оҕо эрдэхпиттэн аҕам хомус оҥорорун көрөн улааппытым. Бастакы хомуспун 1989 сыллаахха кэргэмминээн ыал буолбуппут 10 сылыгар анаан кэргэммэр бэлэх биһилэхтээх хомус оҥорбутум. Ол кэннэ 1992 сыллаахха диэри оҥорботоҕум. 1992 сыллаахха трамваланан 2-с группалаах инвалид буолан нейрохирургия балыһатыттан тахсан баран үлэлээбэккэ олорбутум. Ол олорон уһанан саҕалаабытым, онтон ыла тиһигин быспакка уһанабын. 1996 сыллаахха Мэҥэ-Хаҥалас Бэдьимэтигэр аҕам аатынан зональнай конкурска кыттан станок бириискэ тиксибитим. Ол тэрээһиҥҥэ Иван Егорович Алексеев – Хомус Уйбаан хомус оҥоруутугар норуот маастара диэн знагы кытта свидетельство туттарбыта. 2001 сыллаахха буолбут күрэххэ 1 миэстэ буоламмын 2002 сылга Норвегияҕа буолар конгреска кыттар сертификат туппутум. Онон Норвегияҕа Осло куораттан 230 километр тэйиччи турар Рауланд диэн дэриэбинэҕэ спортивнай-туристическай базаҕа сылдьан И. Е. Алексеевы, С. С. Шишигины кытта упсайа 24 буоламмыт Международнай хомус конгреһыгар сылдьан выставкаҕа кыттан кэлбитим. Хомус уустар үһүө этибит: Бүлүүттэн Петр Осипов, Хаҥаластан Иван Христофоров.
  • Хомуһу таһынан атыны уһанаҕын дуо?
  • Сүрүннээн хомус оҥоруутунан дьарыктанабын. Биирдиилээн билэр дьоммор сакаастаатахтарына быһах оҥорон биэрээччибин.
  • Бииргэ төрөөбүт эдьиийгэр Аан дойду виртуоз хомусчутугар Федора Гоголеваҕа анаан хомус оҥорон биэрбитин дуо?
  • Бу диэн анаан минээн оҥорботоҕум, ол эрэн оҥорбут хомустарбыттан оонньоон көрөн бэйэтэ сөбүлээбитин талан ылааччы. Уопсайынан дьоҥҥо анаан оҥорооччум суох. Эрдэ оҥоһуллубут хомустартан бэйэлэр талан ылалларын ордоробун.
  • Эн оҕолоргуттан, сиэннэргиттэн эйиигиттэн утумнаан уһанар оҕо баар дуо?
  • Орто уолум кыралаан уһанар, быһах оҥоруутугар сүрүннээн холонор.
  • Владимир Семенович кэпсэтиин иһин махтал. Өссө да айа-тута, этигэн хомустары оҥорон дьоҥҥун-сэргэҕин үөрдэ тур!

Интервью Жирковой Туяры Анатольевны.

 
Если Вам интересна эта запись, Вы можете следить за ее обсуждением, подписавшись на RSS 2.0 . Комментарии и пинг закрыты.