Ааспыт сылтан киинэ режиссера Диего Маранзано (Диего Паскаль Панарелло(Италия) “Странные звуки счастья” диэн киинэтэ аан дойду фестивалларыгар кыттан киэҥ биһирэбили ыларын биһиги ыраах Саха сиригэр олорон истэбит. Күн бүгүн Европаҕа бу киинэ көрөөччү киэҥ дьүүлүгэр өссө тахса илигинэ бастакы көҥүл көрдөрүү Дьокуускайга буоллара ситиһилиннэ. Салгыы киинэ режиссера Диего Маранзано (Диего Паскаль Панарелло) тус туруорсуутунан Бүлүү куоратыгар киинэ иккис биһирэбилэ буолла. Онон ахсынньы ый 1 күнүгэр Хомус Аан дойдутааҕы музейын уонна киинин үлэһиттэрэ, Аан дойду виртуоз-хомусчута Спиридон Шишигин уонна тас дойдуттан ыалдьыттарбыт Диего Маранзано (Диего Паскаль Панарелло (Италия), Харм Йоханнес Линсен (Нидерланд) Хомус биһигэ-Бүлүү сиригэр Хомус күнүн бэлиэтиир тэрээһиннэргэ кыттыыны ыллылар.
Диего Маранзано “Странные звуки счастья” документальнай-художественнай киинэтин сүрэхтэниитэ Бүлүүгэ Хомус күнүн бэлиэ түгэн. Автор бу киинэтигэр киирбит түһүмэхтэр үгүс өттө Бүлүү улууһугар уһуллан тураллар. Онон Диего Маранзано 6 сыллаах үлэтин оччуоттуур биир эппиэтинэстээх күнэ. Ол эрэн сиэр-майгы быһыытынан ыраахтан кэлбит ыалдьыттары аан бастаан улуус аҕа баһылыга Винокуров Сергей Николаевич көрүстэ. Көрсүһүү түмүгүнэн, Хомус аан дойдутааҕы музей уонна Киин Бүлүү улууһун дьаһалтатын кытары бииргэ үлэлэһэр сөбүлэҥнэрэ саҥардылларын туһунан икки өттүттэн бэлиэтээтилэр. Кэлбит ыалдьыттарга улуус дьаһалтата өйдөбүнньүк бэлэхтэри туттарда. Баһылыктыын көрсүһүү кэнниттэн делегацияҕа Хомустаах диэн ааттаах Бүлүүтээҕи Олоҥхо ыһыаҕа буолбут түһүлгэ культурнай объектарын көрдөрдүлэр. Салгыы республикаҕа биир баай экспонаттардаах П.Х. Староватов аатынан кыраайы үөрэтэр музейы сырыттылар. Харм Линсен Бүлүүгэ бу 4 сырыыта. Кини Аан дойду культураларын түмэр Нидерланд национальнай музейын тутаах үлэһитэ буолар. Биир идэлээх ыалдьыппыт үгүс ис хоһоонноох элбэх экспонаты түмэр баай музейы көрөн, историяҕа сыһыан уонна болҕомто үрдүгүн бэлиэтээтэ.
Хомус Аан дойдутааҕы музей уонна Киин Бүлүүтээҕи филиала төһө даҕаны өрөмүөҥҥэ турдар экспонаттара кыраайы үөрэтэр музейга түмүллэн дьон болҕомтотун тардаллар. Музейтан салгыы педагогическай училища устудьуоннарын кытары көрсүһүү буолла. Хомус Аан дойдутааҕы Киинин Бэрэсэдьиэнэ Иван Егорович Алексеев-Хомус Уйбаан бэйэтин алгыс тылларын анаата уонна ытыс ымыыта саха хомуһа түмэр күүһүн бэлиэтээтэ. Аан дойду виртуоз-хомусчута Спиридон Шишигин “Ахтылҕан” уонна “Туундара” диэн айымньыларын толорон иһитиннэрдэ. Тастан кэлэ сылдьар ыалдьыттар Харм Линсен (Нидерланд) аан дойдуга хомус суолтатын туһунан, Диего Маранзано (Италия) 6 сыллаах үлэтин түмүгэ киинэтин түгэннэриттэн ахтыылары оҥордулар.
Күн иккис аҥарыгар Олоҥхо дьиэтигэр хомус уустарын, ансаамбыл салайааччыларын уонна общественноһы кытары көрсүһүү үөрүүлээх түгэнэ буолла. Хомус Аан дойдутааҕы музей уонна Киин директора Дмирий Бястинов Саха Республикатын Правительствота олохтообут “385 сыл Россия-Саха сирэ” анал бэлиэни Норуоттар икки ардыларынааҕы маастарга, Куосмас куйаарыгар көппүт хомус авторыгар Р. Г. Чөмчөөйөпкө-Чөмчөө ууска туттарда. Норуоттар икки ардыларынааҕы маастар, уус М.Н. Мальцев Ил түмэн Судаарыстыбаннай мунньаҕын аатыттан махтал сурук тутта уонна “За вклад в развитие музея хомуса народов мира” түөскэ кэтэр анал бэлиэнэн норуот маастара Н.И. Гоголев-Бычаа уус наҕараадаланна.
Киэһээ Бүлүү куорат кинотеатрыгар дьон толору тоҕуоруста. Диего Маранзано киинэ саҕаланыан иннинэ кылгас киирии тыл эттэ. Киинэтин устарын саҕана киниэхэ күүс көмө буолбут дьону ааттарын ааттаталаан туран махтанна. Балтараа чаас устатын тухары киинэни көрөн баран кылгас ырытыы уонна автор киинэҕэ комментарийдарын истии буолла. Көрөөччүлэр ыйытыыларыгар хоруйдаата.
Түмүккэ автор киинэ айыллыытыгар үлэлэспит Бүлүү олохтоохторугар Италия уонна Германия холбоһуктаах “Стефильм” киностудия генеральнай директорын аатыттан махтал суруктары туттарда.
