Муус устар 15 күнүгэр И.Е. Винокуров аатынан Намнааҕы педогогическай колледжка РСФСР үөрэҕириитин туйгуна, СР үтүөлээх учуутала, СР култууратын туйгуна, Норуот маастара, учууталлар учууталлара, “Гражданскай килбиэн” Ытык бэлиэ кавалера, Нам улууһун Бочуоттаах олохтооҕо, ааттаах-суоллаах хомус ууһа Иннокентий Никитич Готовцев – Хоһуун Уус 80 сааһыгар анаммыт “Алгыстаах хомустар” быыстапка үөрүүлээхтик аһылынна.
Готовцев Иннокентий Никитич 1942 сыллаахха муус устар 13 күнүгэр сирин көрбүтэ.
ХХ үйэ биир чулуу ууһа Семен Иннокентьевич Гоголев – Амынньыкы Уус саха хомуһун оҥорууга традиция стандартын олохтообута. Онтон Хоһуун Уус — XXI үйэҕэ саха хомуһун станочнай технологиянан оҥоруу бастакы төрүттээччитэ. Кини хомус тас көрүҥүн улаханнык уларыппакка, оҥоһуллар технологиятын уларытан аныгылыы киэргэппитэ уонна тыаһын тупсарбыта.
Иннокентий Никитич саха хомуһун оҥоһуутун историятыгар дизайн, стиль, композиция диэн уус-уран искусство терминнэрэ туттуллууларыгар олук уурда. Ол курдук, хомус форматыгар уонна хаатыгар киһиттэн саҕалаан, ыйы-күнү, араас харамайы, үүнээйини бэрт табыгастаахтык тиһэн киллэрдэ. П.А. Ойуунускай “Мөккүөр” остуоруйатын хомуһунан уус-ураннык айан оҥорбута саха фольклорун остуоруйаларын композицията чаҕылхай стилизацияҕа кубулуйбут айымньы буолар.
Иннокентий Никитич 2011 сыллаахха лазернай технология диэн үтүөкэннээх ситиһии күлүмэх күүһүн туһанан, саха хомуһун ахсаан да , хаачыстыба да өттүнэн тупсарар, үрдэтэр сыаллаах, хомус форматын лазер сардаҥатынан быһыыны аан бастаан киллэрбитэ.
Иннокентий Никитич саҥа технологиянан оҥорбут хомустарын хомусчуттар олус биһирииллэр.
2011 сыллааххха Иннокентий Никитич оҥорбут хомустара Россия 100 бастыҥ табаарын иһигэр киирэннэр автор анал аат бэлиэнэн наҕараадаламмыта.
Иннокентий Никитич 1994 сыллаахха Намнааҕы педагогическай училищеҕа техническэй дисциплинэ преподавателинэн, учебнай-производственнай мастарыскыай сэбиэдиссэйинэн 15 сыл таһаарыылаахтык үлэлээбитэ. Үлэлиир кэмигэр “Уһуйаан” диэн эбии үөрэтиигэ тимиринэн уһанар уус дьиэтин оҥорон, ыччаты уһанарга үөрэппитэ. Үөрэппит оҕолоруттан билигин Ньургустаан Уваров мастарыскыай тэринэн таһаарыылаахтык үлэлии сылдьар.
Иннокентий Никитич 50-чэ сыл устата 15 тыһыынчаттан тахса хомуһу оҥордо. Бу эттэххэ эрэ дөбөҥ. Хас оҥоһуллубут хомуска кини билиитин, өйүн-санаатын, дууһатын, сүрэҕин-быарын ууран үлэлээн кэллэ.
Иннокентий Никитич сөҕүмэр кэрэ көстүүлээх уонна уустук тутуллаах хомуһун коллекцията Аан дойдутааҕы хомус киинин уонна түмэлин сүрүн экспозициятыгар турар. Сылдьыбыт эрэ киһи барыта сэргии, сөҕө билсиһэр коллекцията. Коллекцияны бүгүн быыстапкаҕа туруордулар.
“Дьүрүл” СР народнай ансаамбыла (сал. импровизатор-хомусчут Владимир Владимирович Колесов) “Эҥсиэли хочото” диэн хомуска дьүһүйүүнэн эҕэрдэлээтэ.
“Нам улууһа” МТ баһылыга Юрий Слепцов “Аҕа саас” Ытык бэлиэни туттарда. Бу күн юбилярга “Ленскэй нэһилиэк сайдыытыгар кылаатын иһин” бэлиэ ананна. Улуус депутаттарын мунньаҕын председателэ Алексей Винокуров, Намнааҕы педагогическай колледж директора Елена Никитина эҕэрдэ тылларын анаатылар.
Аан дойдутааҕы хомус киинин уонна түмэлин үлэһитэ Айсен Деллохов Иннокентий Никитич оҥорбут хомуһунан дьүрүһүтэн оонньоон иһитиннэрдэ.
Салгыы Россия үтүөлээх учуутала, педагогическай наука кандидата, И.Е. Винокуров аатынан Намнааҕы педагогическай училище (колледж) 1989-2003 сс. директора Василий Петрович Иванов уонна СР култууратын туйгуна, Аан дойдутааҕы хомус киинин уонна түмэлин директора Дмитрий Дмитриевич Бястинов эҕэрдэлээтилэр.
Иннокентий Никитич уһуйуллааччыта Ньургустаан Уваров видеонан эҕэрдэтэ иһилиннэ.
Түмүктүүр тылы юбиляр Иннокентий Никитич Готовцев эттэ.
Иннокентий Никитич киһи-аймах духуобунай баайыттан элбэҕи иҥэринэн, ыччат, дьон-сэргэ олоҕо, кэскилэ диэн үлэлээн-хамсаан ситиспит, тулалыыр эйгэҕэ, олоххо киһи үтүөнү эрэ оҥоруохха диэн өйдөбүлэ кини, кини дьиэ кэргэнэ инники олоҕун өссө киэргэтиэҕэ, уһун үйэлиэҕэ, маастар быһыытынан, дьонун-сэргэтин үөрдэ-көтүтэ, айылҕалыын сибээстиир хомуһун тыаһа өссө да чугдаара лынкыныаҕа.
Быыстапканы мустубут дьоҥҥо Аан дойдутааҕы хомус киинин уонна түмэлин экскурсовода Айсен Петрович Деллохов кэпсээтэ.
«Нам улууһа» МТ пресс-киинэ