Бэс ыйын 16-17 күннэригэр Дьокуускайга ыытыллар III-с норуоттар икки ардыларынааҕы бэстибээл-куонкуруска 14 дойдуттан 40-тан тахса кыттааччы кэлэрэ былааннанар. Бу туһунан Хомус түмэлин пресс-сулууспата иһитиннэрэр.

Бэстибээл кэмигэр Орджоникидзе болуоссатыгар хомус тардыытыгар флешмоб тэриллиэ, манна өрөспүүбүлүкэ араас муннугуттан 100 киһи биир матыыбы хомуска дьүрүһүтүө.

««Хомусист-виртуоз мира» бэстибээл-куонкурус Саха АССР төрүттэммитэ 100 сылыгар ананар уонна култууралар алтыһыыларын бөҕөргөтүүгэ туһуланар. 14 дойдуттан 42 кыттааччы сатабылын тургутуо. 100 киһи күргүөмүнэн хомуска биир матыыбы тардыа. Кыайыылаахтар гала-кэнсиэрдэрэ бэс ыйын 17 күнүгэр Саха тыйаатырын сыанатыгар буолуо», — диэтэ Хомус түмэлин дириэктэрэ Дмитрий Бястинов.

«Хомусист-виртуоз мира» бастакытын 1991 сыллаахха тэриллибит. Онно Петр Оготоев, Спиридон Шишигин уонна Федора Гоголева виртуоз-хомусчут аатын ылбыттара. Иккис куонкурус 2011 сыллаахха тэриллибит. Манна Альбина Дегтярева, Юлияна Кривошапкина-Дьүрүйээнэ уонна Ким Борисов виртуоз буолбуттара.

Үһүс норуоттар икки ардыларынааҕы куонкурус былырыын сэтинньигэ буолуохтааҕын коронавирус ыарыытынан хааччахтааһын биллэриллибитинэн 2022 сыл сайыныгар көһөрбүттэрэ. Саха сирин аатыттан тоҕус виртуоз кыттыа: Эркин Алексеев, Артур Семенов, Варвара Степанова, Айсен Деллохов, Айаал Дмитриев, Туяра Жиркова, Арыйаана Михайлова, Нарияна Ренанто-Бочкарева уонна Георгий Слепцов.

Санатан эттэххэ, бырайыак Россия бэрэсидьиэнин гранынан тэриллэр.