Саха Өрөспүүбүлүкэтин Ил Түмэлин бэрэссэдээтэлин бастакы солбуйааччыта, Олоҥхо национальнай кэмитиэтин бэрэссэдээтэлин Александр Николаевич Жирков салалтатынан ыытыллыбыт мунньахха, кэлэр Олоҥхо ыһыаҕын сүрүн хайысхалара дьүүллэһилиннилэр. Мунньах кыттыылаахтара, Кэбээйи улууһугар ыытыллыахтаах ыһыахха, «Күөл тула олорор норуоттар култуураларын сойууһа» диэн сүрүн тосхолу тутуһан тэрийиини ылыныахтара. Бу ыһыах, Аан дойду таһымыгар тахсарын гына сыал туруорулунна.
Сиһилии Аан дойдутааҕы хомус Түмэлин уонна Киинин салайааччыта, Дмитрий Бястинов Олоҥхо ыһыаҕар ыытыллар үлэни кэпсээтэ:
Култуура уонна духуобунай сайдыы министиэристибэтэ, Олоҥхоһуттар ассоциациялара уонна Аан дойдутааҕы хомус Түмэлэ уонна Киинэ ситимнээх үлэлэрин түмүгэр Олоҥхо ыһыаҕын тутууларын хааччыйар сүрүн докумуонугар уларытыылар киирбиттэрэ. Ол чэрчитинэн, Олоҥхо ыһыахтарыгар Хомус түһүлгэтэ тутуллар буолла уонна хомуска сыһыаннаах тэрээһиннэр ыытыллаллара бигэргэммитэ. Олоҥхо ыһыаҕа фольклор бары көрүҥнэрин ситимниир, кэнэҕэски ыччаттарга тириэрдэр, Сахабыт сирин ыалдьыттарыгар норуоппут култууратын билиһиннэрэр ураты тэрээһин буолар.
Олоҥхо уонна хомус өйтөн-санааттан тута хоһуйан толоруу ньыматынан туттуллар буоланнар, ыкса сибээстээхтэр. Олоҥхоһуттар бэйэлэрин тылларын баайынан кэпсээннэрин сайыннаран, араастык иһитиннэрэллэр. Ол курдук, хомуска эмиэ тута хоһуйуу ньымата киэҥник тарҕанар.
Кэлэр Олоҥхо ыһыаҕар, Өрөспүүбүлүкэбит бары улуустарыттан кэлбит хомусчуттарга, тута хоһуйуу ньыматынан толоруу күрэҕэ ыытыллыаҕа. Онон, өбүгэлэрбит кэриэс гынан хаалларбыт култуурабытын, ийэ тылбытын, хомуспут ыраас тыаһын киэҥ эйгэҕэ сайыннарар үлэбитин тохтоппокко ыытыахпыт.
Сахабыт сирин социальнай уонна экономическай сайдыытын сүрүн докумуонугар култуура хайысхатын иһинэн, хомус, ыһыах, олоҥхо, чороон курдук төрүт баайбыт Аан дойду култууратын таһымыгар тахсыахтаах диэн сыал-сорук турар.
Быйыл сүрүн балаһыанньаҕа күүстээх уларытыылар киирэн, Кэбээйигэ ыытыллыахтаах Олоҥхо ыһыаҕар бэлэмнэнии үлэтэ саҕаланна. Бу тэрээһин Саха сирин омуктарын сомоҕолуур, кэнэҕэски ыччакка үйэлээх өйдөбүлү хаалларар суолталаах буолуоҕа.
