Кулун тутар 10-12 күннэригэр «Кэбээйигэ олоҥхо ыһыаҕа: үгэс тутума, «Эбэ» тыына, айар-тутар эйгэ» диэн XVI билим-методическай өрөспүүбүлүкэтээҕи кэмпириэнсийэ Кэбээйи сэлиэнньэтигэр ыытылла турар. Бу тэрээһин XIX Өрөспүүбүлүкэтээҕи Олоҥхо Ыһыаҕар бэлэмнэнии, РФ Бэрэсидьиэнэ Владимир Путин Ыйааҕынан биллэриллибит РФ норуоттарын сомоҕолоһууларын сылын уонна Саха Өрөспүүбүлүкэтигэр Култуура сылын чэрчилэринэн ыытыллар.

Ол курдук, кулун тутар 11 күнүгэр «Хомус – саха норуотун үгэс муусукатын тэрилэ» диэн дьарыктаах олук аһылынна. Хомус үөрэҕин ыыттылар Аан дойдутааҕы хомус Түмэлин уонна Киинин экспозиция уонна выставка салаатын сэбиэдиссэйэ, импровизатор-хомусчут Туяра Жиркова, М.Н. Жирков аатынан Дьокускайдааҕы музыкальнай колледж преподавателэ, импровизатор-хомусчут Артур Семенов уонна Сангардааҕы оҕо кэрэ эйгэ оскуолатын уһуйааччыта, импровизатор-хомусчут Элла Павлова.

Хомуска үөрэнээччилэргэ Элла Павлова хомуһу таба тутарга, дорҕоон таһаарарга үөрэттэ, Туяра Жиркова күөрэгэйдэтии, сыыйа тардыы, матыып таһаарыы ньыматын көрдөрдө, онтон Артур Семенов хомус тыаһын араас ньымаларынан байытан, уларытан, аныгылыы тэтимнээх тардыы ньыматын иһитиннэрдэ. Экспертэр хас биирдии ньыманы иилээн-саҕалаан үөрэттилэр, тутатына көрдөрдүлэр уонна быһаардылар.

Тэрээһин түмүгэр хомус үөрэҕин ыытааччылар айымньыны оҥоруу сүрүн ньымаларын көрдөрдүлэр, конкурс олуктарын быһаардылар уонна тута хоһуйууга сүбэлэри биэрдилэр.