Иван Егорович оһуохайа
Оһуокайдыыр оһуокай,
Эһиэкэйдиир эһиэкэй
Чэйдэр эрэ доҕоттор,
Чэргил сиртэн тэбинэн
Чэпчэкитик дугунан
Сахам сирин үрдүнэн
Саргылардаах ыһыаҕым
Салаллыбыт күнүгэр,
Оһуокайдыыр кэмигэр
Оһуокайдыы турабыт
Оһуокайдыыр оонньууга
Уйгу-быйаҥ элбээтин
Саха сирин үрдүнэн
Оһуокайбыт үксээтин,
Эһиэкэйбит элбээтин,
Оһуо оһуо оһуокай
Эһиэ эһиэ эһиэкэй
Спиридон Шишигин оһуохайа
Оһуо оһуо оһуокай,
Эһиэ эһиэ эһиэкэй,
Оһуокайдыыр оһуокай,
Эһиэкэйдиир эһиэкэй
Хомус Уйбаан барахсан
Хомуһунан уһуйан
Былыргылыыр үҥкүүгэ
Барыбытын хомуйан
Ыраах-чугас дойдуттан
Ыҥырталаан аҕалла
Эһиэ эһиэ эһиэкэй
Оһуо оһуо оһуокай.
Оһуо оһуо оһуокай,
Оһуокайдыыр оһуокай
Эһиэ эһиэ эһиэкэй,
Эһиэкэйдиир эһиэкэй
Альбина Дегтярева оһуохайа
Чэйиҥ эрэ чэкийдэр
Өксөкүлээх убайбыт
Өтө көрөн хоһуйбут
Туҥуй ыһыах тургуйан
Туругурар күнүгэр,
Дэлэй ыһыах тэнийэр
Эҕэрдэлээх күнүгэр
Хоһооммутун холбооттуур
Хомоҕойдуур хомуспут
Ырыабытын ыпсарар
Ымыылардаах чыычаахпыт,
Этигэннир хомуспут
Этэр тыла элбээтин
Өрөгөйө үрдээтин
Эһиэ эһиэ эһиэкэй
Эһиэкэйдиир эһиэкэй
Оһуо оһуо оһуокай,
Оһуокайдыыр оһуокай
Иван Егорович түмүктүүр оһуохайа
Оһуокайдыыр оһуокай,
Эһиэкэйдиир эһиэкэй
Саха сирин сайынын
Саргылардаах ыһыаҕар,
Хомус сэттис түмсүүтүн
Хатыҥ чэчир анньаммыт,
Халыҥ аймах буоламмыт
Халҕаһалаан кэлэммит
Оһуокайдыы сылдьабыт,
Эһиэкэйгэ кыттабыт
Ытык ыһыах ананан
Ырыа-тойук иһиллэн,
Ымыы хомус ыҥыран,
Ыраах-чугас дойдуттан
Аймах-билэ доҕоттор
Айхал-мичил этэммит
Уруйдуоҕуҥ эйэни
Оһуокайдыыр оһуокай,
Эһиэкэйдиир эһиэкэй.
[flashvideo file=video/record.flv /]