Саха норуотун култууратын, духуобунай баайын-дуолун кэрэһэлиир Хомус түмэлэ хомустаах норуоттар култуураларын түмэр соҕотох тэрилтэ буолар. Түмэл общественнай филиаллара аан дойду араас континеннарыгар үлэлии-хамсыы олороллор, сибээһи тутуһаллар, хомус култуурата сайдарыгар кылааттарын киллэрсэллэр. Кинилэр, саха норуотун курдук, хомуһу өрө тутан, үйэ-саас тухары сүгүрүйэр аналлаахтарын дууһалыын ылыналлар.
Хомус түмэлэ билим таһымнаах тэрээһиннэри, чинчийилэри тэрийэн ыытар. Ити тэрээһиннэр хомустаах дойдулар устуоруйаларын, духуобунай култуураларын сыаната биллибэт баайын-дуолун кэнчээри ыччакка кэрэ кэпсээн гына тиэрдэр аналлаахтык тэриллэр. Ити курдук сылын аайы ыытыллар Хомус күнүн кэллэктиип үрдүктэн-үрдүк кирбиилэри ылан көрсөр.
Саха хомуһун охсор уустар ааттара-суоллара ыраахха дылы биллэр буолла. Кинилэр охсор хомустара «саха брендэ» аатынан суон сураҕа чиэски дойдуга тиийдэ. Ити сурах уустары элбэххэ эбээһинэстиир. Саха хомуһун үрдүк аатын-суолун түһэн биэрбэт курдук кылаан чыпчаалга кынаттыыр.
Хомус хомоҕой тылын-өһүн, этигэн муусукатын сүрэххэ-быарга илдьэ сылдьар толорооччулар сылтан-сыл элбээн иһэллэр. Л.Н. Турнин саҕаттан саха хомуһун төрүт муусукатын аар-саарга аатырдаллар, суон сураҕын суо дойдуга сураҕырдаллар. Хомус түмэлин төрүттээччилэртэн биирдэстэрэ И.Е. Алексеев — Хомус Уйбаан, виртуоз хомусчуттар, хомус муусукатыгар уһуйааччылар норуот уус-уран фольклорун сайдыытыгар ааттара көмүс буукубанан суруллуоҕа.
Түмэл отуттан тахса сыл устата сайдыы саҕахтарын тутуһан, инники эрэллээхтик айан-тутан кэллэ. Аан дойду хомустаах норуоттарын култуураларын сайыннарарга, өлбөт-сүппэт дьылҕаланыытыгар кылаата сүҥкэн.
Саха хомуһа сайдарын туһугар норуот кытта ылсыһан үлэлиир. Өрөспүүбүлүкэҕэ ыытыллар тэрээһиннэри хомус муусуката доҕуһуоллуур. Ити буолар хомуска сүгүрүйүү, хомуһу үрдүктүк тутуу, норуот сүрүн-кутун илдьэ сылдьыы диэн.
Инникитин ити үтүө өйдөбүллэри ыччакка тиэрдии соруга турар. Ыччат хомустуур, хомуска сүгүрүйэр, норуотун култууратын, сиэрин-туомун ытыктыыр буоллаҕына – норуот инникилээх, сайдар кэскиллээх.
Айхал буоллун саха хомуһугар! Уруй буоллун уустарга! Тускул буоллун уһуйааччыларга!