Өрөспүүбүлүкэбит 100 сылын көрсө Ил Дархан Айсен Сергеевич Николаев таһаарбыт дьаһалынан Саха сирэ аан дойду хомустаах норуоттарын түмэн, Бэс ыйыгар III Аан дойдутааҕы «Виртуоз-хомусчуттар» күрэхтэрин ыыттыбыт. Бу тэрээһини ыытар иһин Хомус Аан дойдутааҕы түмэлэ уонна киинэ Дойду Президенин культуураҕа фондатыттан гран ылары ситиспитэ. Ол түмүгэр быйыл биһиги сөҕүмэр тэрээһин кыттыылаахтара буолбуппут. Хомус сайдар кыаҕа муҥура суох, ону быйылгы күрэх кыттыылаахтара уонна кыайыылаахтара биһиэхэ илэ-бааччы итэҕэттилэр.
Култуура уонна духуобунас министиэристибэтэ Аан дойдутааҕы хомус түмэлин уонна киинин уонна Аан дойдутааҕы хомусчуттар уопсастыбаларын кытары кэлэр күрэх кэнэҕэски өттүн сүрүн тосхолунан ыытыллыахтаах болдьоҕун Ил Дархан дьаһалынан бигэргэтэрин ситистибит. Онон аны 9 сылынан Саха сирэ айар талааннаах Аан дойду хомусчуттарын хос түмэр тосхолун быһаардыбыт.
Бу сыл өссө биир остуоруйаҕа киирэр түгэнинэн Саха сирин делегацията Германияҕа Берлин куоракка IX Аан дойдутааҕы хомус конгресс-фестивалыгар ситиһиилээхтик кыттан кэлиитэ буолла. Өскөтүн Аан дойдуга 200 тахса хомустаах норуот баар эбит буоллаҕына быйылгы конгресс-фестиваль өрөгөйдөөх аһыллыытын уонна түмүгүн саха хомусчуттарыгар итэҕэйбиттэрэ бу улахан суолта буолар. Онон саха хомуһа сир ийэ икки континеныгар норуоттары сомоҕолоото.
Бу кэпсээбит үтүө түмүктэрим үгүс көлүөнэ хомусчуттар, уустар уонна уһуйааччылар бары кыттыһан ыыппыт уонна ыытар хас эмэ сыллаах сындааһыннаах үлэҕит ситиһиилэрэ буолар. Өссө Аан дойду виртуоз-хомусчуттара диэн өйдөбүл суох эрдэҕинэ кинилэри сирдээбит, бэйэтин ситиһиилэринэн эркээйи охсубут, үгүс ыччакка далаһа кээспит дьоннордоохпут. Кинилэри биһиги биир тылынан “Алгыстар” диэн ааттыыбыт.
Бүгүҥҥү Хомус күнүн дьоро киэһээтэ “Алгыс” ансаамбыл 60 сыллаах айар үлэтигэр ананыаҕа. Өссө даҕаны сөҕүмэр талааҥҥытынан бар дьону үөрдэ-көтөтү сылдьыҥ диэммин Култуура уонна духуобунас министиэристибэтин аатыттан хас биирдиигитигэр хомус кэтэдэрбин көҥүллээн.
Туругурдун Саха Хомуһа! Туругурдун Хомус Күнэ! Туругурдун Сахабыт сирэ!