Бүгүн биһиги «Дьүрүһүй, хомуһум!» өрөспүүбүлүкэтээҕи оҕолор күрэхтэрин биирдиилээн толорооччулар орто бөлөхтөрүн кыайыылааҕа, талааннаах кыыс Виктория Саидованы кытары билиһиннэрэбит.
Вика Ф.Г. Охлопков аатынан Майа орто оскуолатын 7-с кылааһын үөрэнээччитэ. Кини салайааччыта – СӨ импровизатор-хомусчута, Л.Н. Турнин аатынан стипендия хаһаайына, «Муус устар» бэстибээл кыайыылааҕа Игорь Игнатьев.
«Мин, Виктория Саидова, хомуска дьарыктаммытым төрдүс сыла. Хомус – киһини ураты эйгэҕэ уйар, санаатын сааһылыыр дьикти дорҕоонноох. «Дьүрүһүй, хомуһум!» күрэххэ үһүс сылбын кыттабын, быйыл дьэ баҕа санаабын ситиһэн, Лауреат I истиэпэннээх аатын ыллым. Күрэххэ сайыҥҥы күнү кэрэһилиир композицияны толордум: күөрэгэйдэтии ньыматыгар олоҕуран, сахалыы норуот ырыатын матыыбынан киэргэттим.
Сыыйа тардыы, бэйбэрэлэтии, табыгыр, кэҕэлэтии ньымаларынан оонньууру олус сөбүлүүбүн, ону таһынан муусука нөҥүө хомус тыаһын дьүөрэлээһиҥҥэ холоно сылдьабын. Сахабыт биллиилээх хомусчуттара Юлиана Кривошапкина – Дьүрүйээнэ, Олена Подлужная – Уутай толорууларын истэбин, куйаар ситиминэн тарҕаппыт оонньууларын көрөн үөрэнэбин. Кинилэр аныгылыы тэтимнээх толорууларыгар олоҕуран саҥаны айарга дьулуһабын.
Кыайыыбын истэн баран, Игорь Николаевиһы кытары наһаа үөрдүбүт. Санаабар, сүрэҕим тэбиитэ түргэтээбит курдуга! Бу миэхэ иккис улахан ситиһиим буолар. Кыайыыбын бэлиэтээн, Эдуард Тарабукин хомуһун бэлэх ылан олус үөрдүм, бу миэхэ улахан ситиһии. Инникитин даҕаны хомус тыаһын сайыннарыам.
Күрэс иннинэ салайааччыбын кытары күнү көтүппэккэ дьарыктаммыппыт. Игорь Николаевич оонньуур техникатын истэн, Петр Оготоев ньымаларын үөрэтэн, Спиридон Шишигин композицияларын ырытан, элбэхтэ дьарыктаммытым бэрт түмүктээх буолла.
Инники былааным – оскуоланы бүтэрдэхпинэ, култуура эйгэтигэр үөрэххэ туттарсар, онтон салгыы аан дойдуга биллэр хомусчут буолуохпун баҕарабын. «Дьүрүһүй, хомуһум!» күрэх инники кыттааччыларыгар этиэхпин баҕарабын: элбэхтэ хомуһу тардыҥ, олоҕурбут ньымалары дириҥник баһылаатаххытына, үрдүк ситиһии эһигини күүтэр!» – диэн Виктория Саидова сэһэргээтэ.
