Аан дойдутааҕы хомус Түмэлин уонна Киинин үлэһиттэрин аатыттан, өрөгөйдөөх 65 сааскын туолар үбүлүөйгүнэн, ис сүрэхпититтэн итиитик-истиҥник эҕэрдэлиибит!

Эн – Саха норуотун үйэлээх үгэһин, тимири уһаарар уонна маһы кыһар дьоҕурун тыыннаах ситимэ буолаҕын. Бүлүү сирин нэһилиэктэригэр оҥорон таһаарбыт пааматынньыктарыҥ уонна сквердэриҥ — норуот махталын уонна үйэлээх өйдөбүлүн иҥэринэн тураллар. Хомустарыҥ, быһахтарыҥ Саха сирин эрэ иһинэн буолбакка, тас дойдуларга тиийэ биллэллэр, норуот духуобунай баайын үрдэтэллэр. Хомус түмэлигэр хомустаргын экспонат быһыытынанбэлэх ууммутуҥ — Эн саха норуотун култууратын үйэтитэр, улахан маастар буоларгын өссө төгүл туоһулуур.

Эйиэхэ инникитин даҕаны айар кутуҥ арыллан иһэрин, өбүгэлэриҥ күүһэ-уоҕа куруутун арыаллыырын, доруобуйаҥ чэгиэн, дьиэ кэргэниҥ этэҥҥэ буоларыгар баҕарабыт! Эн аатын үйэлэргэ өссө да ааттана, утумнана турдун!